مفتتــــــح ـــــــــــــــ

خيط عنكبوت
من عتمة الموت والبيوت
رشق ابتهاجه ف سقف روحى وابتدى –
يسحب شعاع
من دهشة الشمس الجريحه
ودايره من ضى القمر
وف غفله من دمى المشاكس جوه بطن الأورده
فتح الزوايا المستكينه للغرق
فانسابت الدقات سنين
على سطح قلبى وانفرط –
عمرى الحزين
شـدّ المثلث من تجاعيد الزوايا المفرده
وف حته فاضيه من الهوا
سحب النهار 
ورتوش من الليل البهيم
كـوّن مثلث من نفايات الرماد
واندار وثـبّـت نن عينه –
ف دايرة الضى الأرق
وف لحظه واحده انهارت الدقّــات فى قلبى –
فاتحرق !!
**************
ــــــــــــــــــــــــــــــــ
الزاوية 64 درجة
ـــــــــــــــــــــــــــ

أمر انفرط
من فوق غيوم المملكه
فاشتد صوت الرعد –
والبرق اشتعل
لــمّ القمر كل النجوم
وادارى فى الليل والسّحُب
واختال فى مشيه ....... وانسحب
والشمس غطت وشّها
فاختل طولها وانفرط
على فتحة ( الأوزون )
وتاهت فى الهرب
سقطت على ( التورنارو ) كومه من اللهب
زاد اشتعاله وابتدت
دقّــات طبول المعركة
واسودّ لون الكون وسابت فى الرياح الزلزله
بركان عجيب قسم المثلث دايرتين

- ونزلت انا - !!
حافى وعارى من الاراده ولاختيار
فاختار سواد الكون عيونى
وطار مرار الغربه –
وف قلبى اترشق !
نطيت أنا من رقدتى
بصيت للون الكون وفرض المعطيات
ووقفت فوق تلّ اللاشىء
أنا مين ؟!
وليه ؟!
مسألتى تاهت فى الزمن
رقمى المشفّــر تاه فى جحر الزاويه –
غطّــاه الوتر
شديت حواجبى لفوق .....
لفوق
ورميت شفايفى المستكينه بعيد عن الوش الخطر
سقطت على صدرى ابتسامه بلون حباحب المطر
سنّــدتها –
ورشقتها ف قلب السما
************
ــــــــــــــــــــــــــــــــ
الزاوية 90 درجة
ــــــــــــــــــــــــــ
____________________
مدّ الشعاع ايده فى قلب المستحيل
نفض المثلث جبهتـــــــه
وانهار على سطـح الهديـــل
سر الهــــــوى
_____________________

فتحت ( حليمه ) الباب لقلبى ورفرفت
جمّعت نفسى وطرت فوق
أبعد من الأرض الخراب
حطيت على كتافى القمر
ونسجت عش من المدينه الفاضلة
ووصفت حبى ف حبها من غير كلآم

ـــــــــــــــــــــــــــــــــــــــــــــــــــ
مدّ الشعاع ايده فى قلب المستحيل
نفض المثلث جبهتــه 
وانهار على الشط الجمـيـــــــل
سر الكـــــرى
ــــــــــــــــــــــــــــــــــــــــــــــــــــــــ

حطيت هموم الكون على كتافى العتيقه
ركنت ضهرى على الجدار
ورشقت سهمى فى المدار
علّــيت نجوم
وخسفت بالحر الشديد اللى ابتدى –
يحرقنى من شمس البشر
غيّـرت لون البدر
والغيم
والمطر
وسحبت تاج المملكه على جبهتى
وف لحظت التتويج .......
نعست !!
ـــــــــــــــــــــــــــــــــــــــــــــــــــــــــ
مدّ الشعاع ايده فى قلب المستحيل
نفض المثلث جبهته
وانهار على الجسد النحيل
سر الردى
ـــــــــــــــــــــــــــــــــــــــــــــــــــــــــــ

فاض المنام
على روحى فاحتجت شرايين الوله
دخلت ( حليمه ) ف توب رمادى –
وتاج من الفحم الشّــره
أنا فين ؟!
وليه ؟!
قطفت لسانى وجردتنى من الأمل
واستحضرت اّخر القصيده
وصوره باهته لوقفتى
فوق اللاشىء
لمّيت اّثار البسمه من شوك الطريق
وصرخت من غير أى صوت
غنّيت كما الحيسوم
فى اّخر نزع وانسابت
على وش الحريق
روحى ... ومت
**************
ـــــــــــــــــــــــــــــــ
الزاوية 98 درجة
ـــــــــــــــــــــــــــــــ

هامش لونى
ـــــــــــــــ

من حرّ فكره وباختياره –
الغير مهجن
طار فؤادى فى السما
وف غفله من ضى القمر
شرب البياض كله ونزل
فاتلوّن الكون
بابتهاج النور فى قلبى 
واهتدى للسر
فانزاح الحجر
!!!!

هامش عمرى
ـــــــــــــــــ

1 – 2 – 3 – 4 – 5 – 6
دق الجرس ودخلت أول مدرسة
7 – 8 – 9 – 10- 11 – 12 
بصت لى شمس المستحيل
وسابت لى وشم على الجبين
13- 14 – 15
اشتد عود قلمى وكتب
16 – 17 – 18 
رصّيت همومى على الرصيف
وقعدت مستنى الأمل
19 – 20 – 21 – 22
صفا وانتباه ورميت على كتافى السلاح
23 – 24 – 25 – 26
زغروتته عاليه ف ميتمى
نفضت غبار الأوليا
27 – 28 – 29 – 30
حطت على كتافى الرسالة قيود حديد
31 – 32 – 33 – 34 – 35
عمرى اللى فات

***********
حكايــــــه 
______

ستى الغبية
المستكينه لجهل موروث عن جدودها –
اتربعت
على مصطبتنا ف حاره من شارع كبير
واتلم كل عيالها وعيال العيال
مستنيين حدوتة الشاطر حسن
!!
صلّت على العدنان وقالت
.....
..... 
.....
فانتبهنا واتفزعنا
رجعنا تانى للهدوء
وتقول ونسمع والنهايه
تشد فوقنا الطانية
ف اّخر الحدوته دايما 
ننتهى

************

موجز الأنباء
ــــــــــــــــــ

من ( واى بلايتيشن )
لاّخر ضربه فى قلب العراق
سقط العقال
بين الحدود الجغرافية
وانتهى دور البراق
*************



الزاوية صفر
ــــــــــــــــــ

الشمعه وقفت فوق كتاف التورته والعد ابتدى
( 5 ) الفودكا والكافيار على انغام هديل –
السيمفونيه السابعة والعرى الهزيل
( 4 ) من بين رموش المستحيل والممكنات
جدلية الموت الذليل
بدأت فى تتويج الملك
( 3 ) اتعلقت كل العيون 
بالتورته الوحيدة
وتمتمت
( 2 ) الرعب خيّــــم ع المكان
( 1 ) نفخة قلق
والتانية والمليون
ولكن للأسف
.......
( صفر ) وقع الجميع 
والشمعه طالت وابتدى
نورها الضعيف
يفرد على كل الوطن
ــــــــــــــــــــــــــــــــــــــــــــــــــــــــــــــــــــــــــــــــــــ
من ديوان ( نوبة جنون )
للشاعر ناجى عبد المنعم
ــــــــــــــــــــــــــــــــــــــــــــــــــــــــــــــــــــــــــــــــــــــ