تلحفي يالزهور وهاجري يالطيور
جاك الشتاء والليالي تطوي حبالها

الليل طال انتظاره والنهار الغيور
قصرت خطاويه والهقوات حنا لها

والشمس ضيف لها نقطة مقيل وعبور
يحدي ظلام الليالي باقي اطلالها

والظل طالت خطاه وجلسته والحضور
والمزن يهمل ويجري منه شلالها

الارض تفرح بقطرات المطر والسرور
يشمل نواحي تشوق كل من جالها

تدور الايام وفصول السنه في مرور
ولادامت ظروف دنيانا على حالها

مره على مانحب وبعض مره تجور
نعرف صواديفها من كثر موالها

ناخذ جميل الدرر من وسط ذيك البحور
يهوى شعوري قوافيها ومنوالها

هزيت غصن القصيد وطاح كل السطور
في دفتر الوصف يزهى النظم خلخالها