الناس لو هي عن صفا الود تطريك
اكيد منبتها مطيّب خراجه

لو الغلا بالناس دايم بيعطيك
شيٍّ فقدته وانتهيت بعجاجه

الناس فيها طبع جدّد معانيك
واللي يبي حاجته طافي سراجه

اخلاقهم هالناس تحدّد مباديك
ان كنت ناوي تستبيح العواجه

اللي على مبداه ميّت ويحييك
لو اجتمع ناسه يزيد ابتهاجه

هذا صفيّ النفس يفرح بطاريك
ويفرح اذا تحتاج من ايديه حاجه

نفسك تشاكل داخلك وهي تودّيك
وشلون بين الناس ماتطري عجاجه

حتى النبي قال شاور ان كنت اوصيك
ما خاب منهو بالمشوره علاجه

عندك وبالميزان اخلاق تنجيك
وعندك بعد منهم يسوق السماجه

بصم الاصابع تختلف بين ايديك
وشلون بين الناس ماتشوف حاجه

طبوعهم هالناس اذا ربّي يحييك
غير الطبوع اللي تبطّي خراجه

الله خلق ناسٍ من النبع تسقيك
والله خلق مرضى طباع وهماجه

♥️♠️ عذوبة الحرف
‏┈┉✿•༻✨༺✿┉┈