يثيرني في مشاغب الروح واثور
واعطيه من سوق المعاني جزيله

ابكيه لامنه تأخر عن حضور
والظن ياخذبي على سرج خيله

احب فيه الحب باحساس معذور
ولالي على درب المفارق وسيله

لو كان يرمي بي على النار مسرور
فدوة حبيبٍ ماعشقنا بديله

الناس واجد لكن القلب ماسور
اللي شبكني شبكة الله وكيله

احيان يجرحني واعاتبه مقهور
اهجر وصاله والمشاعر عليله

واحيان نسمات الوفا عطر ممطور
يثري دروبي والمحافل اصيله

ماله شبيهٍ وان حصل شبه معسور
والفرق في بعض البوارق قليله

انيق في خصال الطبايع وميسور
والطيب ميراث الفعول الكفيله

ماهو حقود القلب نذلٍ ومسعور
ابيض بياض الثلج كلن يخيله

كفه عطا مغموسة المسك وعطور
نفسه على عليا المكارم نزيله

حبه عميق وداخل القلب محفور
ماهزته ريح الليالي الثقيله

مجبور في عشقي وانا فيه مجبور
ولا جبرنا جبرٍ يغير سبيله

يالله ياربٍ خلق سبعة ابحور
تحفظ خليلٍ ميتٍ في خليله

انت الجليل اللي بالاحكام مقدور
مالي سواك ارجيه والا ارتجي له