نفح القصايد شيح والبحر كادي
غنى بها القمري ترانيم  والحان
.
وترزّمت في الروح مزنٍ غوادي
ما طاعن إلا ينبت القاف ريحان
.
هالأمسيه ما هي كراسي وحادي
ولا هي مكبّر صوت لاسماع واذهان
.
ولا هي بجماهيرٍ تصفّق.. تنادي
ولا اظنها "لمبات" مسرح وبيبان
.
هالأمسيه تشبه روابي بلادي
جمهورها قلبٍ توسّط بشريان
.
والمسرح اللي فيه صفْق الايادي
هذي هي الخفقات في نبض وجدان
.
ما قد تحول دفتري صوت شادي
ولا عمرها الاوراق تتحول امزان
.
إلا هنا.. فـ عمان كل شي عادي
عادي يصير الشعر مخلوق لعمان!
.
يا ارض الكرم يا ام الحكم والمبادي
من شاطي مسندم إلى راس سمحان
.
انتي وسلطانك وشعبك.. شدادي
اللي تقود ظعونه المجد والشان
.
(قابوس) تاج العز والعز بادي
ما يحجب الامجاد ريحٍ وطوفان
.
في (السلطنه) حتى اليتيمه سْنادي
ما تيتمت روحٍ و(قابوس) سلطان
.
بشته ذرى الأوطان.. غيث المنادي
وبحكمته يوزن سلاطين واوطان
.
متوحده يا (عمان).. سقم الأعادي
و(فلك السلامه) عطرها (بْخور ولبان)
.
أنا فـْ (صلاله).. لأّ.. هذي بلادي
دارك يا (بوسلطان) معشوقة (عْمان)