صحيح أمانينا اطوال وعريضات
أحلامنا ياليت منها اختصرنا

تحقق الأمال جداً صعيبات
الا بفضل اللي بفضله غمرنا

تمرنا أسنينٍ والأيام عجلات
وعند الله المعبود كامل خبرنا

سنة إله الكون رب السموات
في حكمته يجري علينا قدرنا

ماهو على ارضانا ونبع القناعات
وباللي كتب ربي علينا صبرنا

احيان يغرقنا الفرح والمسرات
واحيان نبكي من ظروف و قهرنا

نصبر على الضيقات مره وحزات
وأن زادت الاوجاع ربي جبرنا

ومن طاع نفسه مافلح بالنهايات
هي العدو اللي توجب حذّرنا

مادام رغبتها تجيب المتاهات
هي قمة النقصان واكبر خطرنا

ومن طاع ربه ذاق طعم الملذات
ومخالفة شرعه سبايب كدرنا

والواقع الدنيا اختبار ومهارات
ولابد مانحصد ونجني ثمرنا

لونملك بنوك وقصور وعقارات
أحطام يادار الفناء لو عمرنا

واليا قرينا من القصص والروايات
من ماضي الاجيال ناخذ اعبرنا

تاريخهم حافل بصدق البطولات
ولامجادهم ووضاعهم ماحصرنا

واكذب عباره قيل مافات قد مات
لومات ماضينا ترى ماحضرنا

لنا مع الماضي عهود وعلاقات
وحنا من الماضي نجمّل صورنا

ناخذ منه درسٍ جميل العبارات
من القدوة اللي ماتسبب ضررنا

يارب ترزقنا العلى من الدرجات
ومع زمرة اصحاب النعيم اتحشرنا

نرجوك ياعالم بكل ٍالخفيات
انت الكريم ولك عبدنا وشكرنا

مع كل يوم ٍ فيه تطوى سّجلات
يالله عسانا في نعيمك ظفرنا

وصلوا على اللي مامشى بالخطيات
المصطفى نور الدّجى هو فخرنا

شعر: سحايب العازمي