ياهية يلي تنظر الناس بغرور
اعسف غرورك في تواضع شموخي

قافي على بدع الجزيلات مشهور
وأبيات شعري للطنايا تنـوخي

بقلم الشاعرة الشمرية المجهوله

ــــــــ ــــــــ ــــــــ ــــ

يامبدعه بالقاف قافك على نور
ياصل لآخر منتهى في طنوخي

يحقق المعنى مثل در منثـــور
ويرأب الصدع المقفّى بشروخي

الشاعر حمد آل يوسف العبدلي الشريف الهاجس

ــــــــ ــــــــ ــــــــ ــــ

تاريخ شمر بين الأنام مذكور
مايجهله. الا مكابر مسوخي

الجد.حاتم والكرم صار مخبور
ياشامخه. ماتقبلين الرضوخي

الشاعر
محمد الثوعي
ــــــــ ---------ــــــــ

ياعاسف المعنى خذ العلم والشور
ذكر النبي افضل من شيوخك وشيوخي

واصحابه اللي خلدوا المجد مسطور
انا خوا كلاب الفُرس والروم نوخي

الشاعر / محمد علي بركوت
( الهبير،،)

ــــــــ ــــــــ ــــــــ

الكاذي من جازان مع فل وخطور
هدية من جازان لبنت الشيوخي

أهلاً وسهلاً بالعفيفات والحور
وقافكم مسبوك حريرٍ وجوخي

الشاعر أحمد يوسف غازي
(ابو سند)

أنت أيه ياللي علي تلف وتدور
بعض الوجيه ماكنها الا مسوخي

ان كان تبغاني المرض ولا دختور
مثل وسم النار يسبب نفوخي

الشاعرة
(بنت الشايب)

ياناظمين القاف في بيوت وشطور
قررت أطلق في قنصكم فروخي

ما بيننا الود والطيب مشطور
ومن الشرك ياصيد حذراك توخي

الهبير،،،
____

ما يستويَ المطنوخ واللي به غرور
قيفان تشمخ عند قافي تدوخي

شعف الجبال يهابها ساكن قصور
قيفان تقدح نار ماهي شروخي

مكي الشامي

ياللي كتبت الشعر خله بلا كسور
حاول تجيب البيت مابه شروخي

اما يفوح البيت فله مع بخور
واللا اعتزال الشعر يحفظ شموخي

علي الجعفري - خنجر الجعافره

_______

في ساحة الفرسان لي فعل وظهور
بالبس حزامي مع حسامي وجوخي

من هاجسن يعبر محيطات وبحور
مايلتفت صوب الشبك والفخوخي

الشاعر علي بن حسين العبدلي الشريف (شاعر الأشراف)

الي يماشي الطرح والقاف مشكور
ما نقتفي طرحه ولو به شموخي

شايف تعدى الحرف تاريخ جمهور
لو كان ما يرضى بعقله ينوخي

♥️♠️ عذوبة الحرف‏
‏┈┉✿•༻✨༺✿┉┈
————————-
عيني تخيل الورد والدر منثور
بالجيد مابين الجواهر وجوخي

ناديت له كني من الناس مسحور
ومن الوله عيت ركابي تنوخي

د. محمود العلواني أبو علي