|
|
|
|
|
|||||||
| هيئة إدارة تحرير مجلة عاشقة الصحراء التي تعنى بقضايا المرأة العربية والأدب والفن | |||||||
|
(احبّچْ لا تْكرهيني) ؟..................... بقم الشاعرة العراقية وفاء عبدالرزاق
الصوچ منّي ومُوش منّچْ يانظر عيني
دوم اشوفنّچ احليوَة ولا بسة اسنيني
تاخذني الذكريات بنور تِلويني
ولَنّي اسم الله بحضن بيبيتي
وفرحة أمَي بلوَن ضِدَّني
أسوَدْ ليلي غطّى بصبح جَنبَيني
ويوم گمت احبي واشمّن مِسِچ
ذيچ الگاع
ويوم شدَّيت قرديلات شَعري
ويوم جيت بعَشرتي و عِشريني
ويوم دگّيتْ الصور فوگ حيَل الباب
اخاف مناطِري يغفه ويغشّيني
وأترجَه الهوا مِن يصفگ يصحّيني
أوَنسنّه او سِچاچيني ثلاثيني
وْجيَت بأربعيني اعثوگ تِحويني
خاف ما يكفيچ عثگي الطيّحه الحاصود
هاها اوخاف ما تكفيچ خمسيني
أخبرچ كل شبر بالگاع يحچيني
يدري بلَهفتي تگمّز شراييني
أرسم علورگ أشكال من بيبان
وأنطر باب واحد بَسْ ايواسيني
أبوس بعِتبه وأشمِسْ ابستّيني
أگلّچ خاف ما يكفيچ هذا الصار عذريني
حطّيني بوَسط ريتَيچ رفّيني
تِنَفسي وحيل شمّيني
صُفرة عتَب تاخذني وتودّيني
وگبل لا تاذيچ تاذيني
وأنا لأجلچ شمِع عيدين
أعلگني و أطفّيني
واتوهّم اخيال و جاي مِنّْ ابعيد يعنيني
أعوْذه امْنْ الحسد والعين
وانده ها. ….
ها يَبنيّة الطيبين عَوذيني
لفّيني جگارة وتايهة بدخّان
يلطاغوت دَخنيني
و حسبيني غٍريب وجاي يشكي الحال
حسبيني طفل لايذ مثل عصفور
آنَه طوَيَر وانتي اجناح شاهيني
وحگ اسمچ ترى انهدّيتْ وانفتّيتْ
گولي شلون تبنيني؟
١-القرديلات:
الشريط الذي بُربط بالضفاير على شكل وردة. هذه الوردة نطلق عليها ( قِردَيلة)
٢- اللوحة للفنان محمد سعيد الصگار في داري
الكاتب:
سكرتيرة التحرير مريم حمدان بتاريخ: الثلاثاء 28-02-2023 08:29 مساء الزوار: 439
التعليقات: 0
|
