كثر الله خير ايامٍ كوتني
كيةٍ عنها عجز طب الطبيب

لزةٍ بالعظم حيلٍ موجعتني
في صميم القلب غيبني مغيب

عزتي للعين في حين ادمعتني
لين حد الشوف اضعفه النحيب

مامضالي من حمولٍ مثقلتني
هولت طفلٍ كبر قبل المشيب

سرمدي الليل غربه قاسمتني
ويل من مثلي فقيدٍ للقريب

دنيتي اللي في عزاها لوعتني
اذهلت روحٍ بكت حظ النصيب

ارتجيت الهون لكن مسعفتني
كنها قصمة ظهر صبٍ صبيب

ليتها لو لمحت لي واخبرتني
كان جهزت الحذر لو هو غصيب

شكلتني بالقهر لين ادمرتني
والله اللي مطلع وهو المجيب

لا رأتني في انبساطي رجعتني
للحزن حتى اصهرتني للمذيب

ياالهي رحمةٍ منك اغمرتني
قدرتك يالواحد الفرد الحبيب