شاعرك في بحر المتاهات قبطان
في ناظره بتشوف مركب نجاتي

واليا علت الامواج ماني بغرقان
اصعد على موج الحزن في ثباتي

ولو مهجتي ضبيٍ وترتع بالاشجان
ف البسمه ب وجهي تعانق شفاتي

دمع الرّجل ما منخلق لجل ينهان
واجمل دموعي من تطيح بصلاتي

ولهان؟اكذب كان ما قلت ولهان
لكن جروحك حاصرتلي جهاتي

ياما اجي لك اعتذر وانت غلطان
حتى تماديت الخطا يا غناتي

صح ان أحبك موت واعشقك بجنان
وان غبت اذبل وانشغل بك واحاتي

واتغربك وانت بحياتي لي اوطان
واسمك يلوّن بالفرح مفرداتــي

لكن يا زين الموت واحظان الأحزان
ولا شربة" بالذل بتبل لهاتي

ماانته بأول فرح افقده بانسان
ولا انت بآخر شخص يخسر رضاتي

ولاني باول من زرع ورد يفلان
والعطر حق غيري و شوكه جزاتي

عمري قفار واهدي الغير بستان
واللي عطيته عمر يبغى وفاتي

الزود في بعض العلاقات نقصان
و الحب اصدق حب حبي لذاتي

وقلبي تعرفه يعشق الصعب بادمان
والا السهل مايحتوي لي شتاتي

ولاني احبك اعشق تكون فرحان
وفرحتك هي غايه وكل امنياتي

وانت تمنّيت الجفا و رحت يفلان
اشهور ما تسأل وشنهي سواتي

ياللي حضورك باهت و ماله ألوان
هاك اعترافي واخر الموجزاتي

تبقى أو أن بتروح ماني بزعلان
وياك وبدونك بتمشي حياتي

عايد مرزوق العويس