اضحك بوجه الحزن واقول معذور
            أدمنت قربي والمواجع مسَرّك

يامر حبابك حتى لو كنت مقهور
        تمرني والشوق بالفعل جرّك

ماكانت الصحبه من ايام وشهور
      عليك صابر والمشاعر تبَرّك

حضورك اللي صار بالقلب محفور
          اقرب من الأفراح سهل ٍ ممرّك

عشتك سنين العمر بالصدر مقبور
         ماشفت خيرك بس ياكبر شرّك

دوله ولكن دون شرع ٍ ودستور
       تفرض على المحكوم يدخل مقرّك

اجتزت بعدك كل ماكان محظور
      عبرت بحر الظلم عانقت برّك

جرّبت في الدنيا وصادمت جمهور
      ناس ٍ تقول اليوم لله درّك

رفيق عمري احذر الغدر والجور
      اسمع كلام الصدق عندي مدرّك

رجل ٍ حقر غيره من الناس محقور
       عينه على عثرة جوادك وغرّك

من يتبع الجهال مايعرف النور
      من لا نفع نفسه ماسرّك وضرّك

غيرك تعرض للتعب عاش مكسور
      في موقع الاحداث صاير مشَرّك

#محمد_الثوعي