من هواك ارجع من أول وابتدي

باكتب ابياتي عشانك بيت بيت

حرف حرفن في تسلسل ابجدي

تهت من بين القصايد مالقيت
ما يعبر عن غلاتك يابعدي

ثم هيضت المشاعر وانتقيت
كل مايمكن يوصل مقصدي

جبت بحري والقوافي ثم بنيت
مايناسب حضرتك ياسيدي

حدني وصفك الى مني رقيت
لين لامست الثريا والجدي

خصك الله بالمزايا واعتليت
ناعسات الطرف والعود الندي

دلعنة في كل خطوة لامشيت
بك جماهير العذارى تقتدي

ذرب باسلوبك ومزحك لا حكيت
شايلا" معك البساط الأحمدي

روعتك بالفرعنة لو مارضيت
لعن ابوخير هذاك المعتدي

زلتك الها ألف عذر اذا خطيت
ليه عذر وانت اصلا" مهتدي

سم باسم الله وقلي وش بغيت
انت تستاهل وانا ماني ردي

شاعرن حساس لكن لاغزيت
الحروف أتلها من مجندي

صارلي من اسمي نصيب إذاطريت
العطا وعن العطا ماينغدي

ضد من يفخر بشعره دون صيت
الفخر بالفعل ادا صار أجودي

طول عمري ماحسبت ولا رجيت
غير من رب البريه مسندي

ظالمٍ نفسي بنفسي ولا دريت
ان انا المظلوم وانا المعتدي

عندي عادي في طريقي لا مشيت
مع خوين ولا امشيه وحدي

غير يومنك بدربي انت جيت
والامور زمامها ماهو بيدي

فلها مادامني فيك ابتليت
والمشاغب صار في حبك هدي

قم وكت اللي عليها من حليت
لايهمك ثلج هملول بردي

كلها تدفى معاك اذا دفيت
وان بردت الكل معك بيبردي

لا يهمك بس اشر لانويت
ابشر بعزك وانا عند وعدي

مابي يرجع يوم عن عيني اختفيت
ولابي يوم فراق روحي لجسدي

نوخ ركابك صراحة استويت
لك من يروي ويهيجن ويحدي

هذا انا جيتك وانا فيك انتخيت
عاد قلها .. هاه (( ابشر بسعدي ))

والا اعود نص حي ونص ميت
منتهي لولا خيال السرمدي

ياحبيبي لو اقول اني انتهيت
في هواك ارجع من اول وابتدي

عطاالله قطيش الشراري