الرصيف
فى كل الخطاوى .. أنا لسه شايفِك
بواقى كلامك...
بتسدل شطوط الحنين من عنيكى
ونفس الرصيف اللى كان بينا شاهد
بيسأل عليكى...!
فيخدش جمودى
بنحلم تعودى تلمى اللى باقى
وانا لسه عايش ماخنتش وعودى
بيسألنى عنِك .. (الرصيف)
فين محتواك ...؟؟؟
فين اللى كانت بتحضن لُقاك
وتسمع لهمسك بقلب البرىء
وخلقت فى حضن العيون الطريق
دلوقتى ليه انت وحدك غريق
مع الوحدة عايش
وعودك ضعيف
بترمى وجودك فى حضن الليالى
وليلك خريف
وشايب وريدك .. برعشة سؤالى
بقيت شىء ضعيف
وحتى الطريق اللى ساع المشاعر
خالى وخنيق..!!!
ودلوقتى اضيق!!!
لُقاكم بيشرَق
فى سكه طويله لأول محطه
فراقكم بينهج
وروحك بتنزف وتحتك سراب
فارحم سجايرك
وإرحم كئوسك
وإرحل بروحك من الإغتراب
حقيقى قابلت اللى تاه من عنيها الحنين فى التراب
عارفك بتحلم بيها تضمك
لكن مين يحسك ....؟!
روحك شوارع كتير اللى زارها
لكنى فى شارع وحيد جوه روحها
ومكتوب بإسمك!!
صداع الحنين اللى ساكن شرودك
وفاض فوق خدودك
سؤالك عيون البنات الحيارى
فى كل اتجاه
تجيبك خطاوى لشاهد مابينكم
ماجاش من فراغ
أكيد لسه ليها مكان جوه منك!!
أنا لسه فاكر
طريقة تصالح روحك معاها
وبينك وبينها مافيش خرم إبره
فى يومها انت دوقت الوعود فى الشفايف
أنا لسه فاكر
رعشة وجودها فى قلب المكان
وخوفها اللى خايف ... مين اللى شايف
مين اللى عارف حبك اليها
فاسأل عليها...؟
ليه انت راضى تبيع زكرياتك
مع العلم انك عرفت بــ رجوعها
وياما فى رحيلك أنّت جحودى
ياما دموعها بلّت وجودى
عشان بس ترجع
ياما قالتلى فراقك ... بيوجع
لكن مين هيسمع ...!!!؟
خدتها الليالى .... لابعد مكان
وإسال خطاوى الرحيل قبل منك
إسال وشوش الشجر راح تقولك
إنت السبب فى الفراق قبل منها وموت المشاعر
فإكتب يا شاعر
وفرغ كهوف الوجع ع الورق
وارمى وجودها فى حضن الدفاتر
يمكن تنام !!!
ويوصل كلامك هناك للبعيد
وجايز تحسك...!!!
.
.
على التمامى
|
|
|
||||||||||||||||||||||||||||||||||||||
|
|
||||||||||||||||||||||||||||||||||||||
  المشاركة السابقة : المشاركة التالية 
 |
|
|
|
|
Copyright©2016 All Rights Reserved
