دمعي يهل وخافقي ينحمس حمس
يالايمي لحظه ترى الوضع حساس
جرحي بليغ وصعب ما يحتمل لمس
واطهر بقاع الأرض تحرق وتنداس
بعدك صلاح الدين ماللعرب رمس
مدة يديها وصافحت كف الانجاس
كف ملطخ بالدما غامسه غمس
وناس تصفق ذل وتقول لاباس
تعال واسمع شوف يالوعة القدس
مسرى نبي الله في ليل الادماس
من عصر ماضي ماهو اليوم والامس
قدام ماتلقا العرب راحة الباس
يوم الرجل يربط على بطنه الدمس
جايع ولكن مؤمن القلب بجاس
ماعندهم لكزز ولايركبوا جمس
في معركة مؤته على قب الافراس
عود القنا والسيف والشلف والترس
واحيان في صدر العدو سهم الاقواس
تسمع غطاريف النشاما تقل عرس
ليل ونهار وفعلهم يرفع الرأس
ويالمسجد الاقصى فلا يلحقك طمس
ارجوك عذرا وارفض الحزن واليأس
تخنقني العبره والاشعار لك همس
وان جيت اعبر عن شعوري والاحساس
ماني بعنتر لادعونه بني عبس
انا سعودي داري العز والساس
بقيادة اللي حافظ المجد بالخمس
سلمان قايدنا كما الحر قرناس
وأدعي اله الكون ومنور الشمس
يلطف بحال القدس والأرض والناس

الشاعر / إبراهيم عوده الحصان
السعوديه / تبوك