عساك عز ن للعرب والمسلمين
وعساك نصر ن للسعودي يرفعه

ومعك يزين الحال والفرحة تبين
على وجوه ن من تعبها مشبعه

والله يعوضنا على فوت السنين
اللي مضى بالعمر صعب نرجعه

ياعاشق للشعر والحرف الرزين
اسمع سمان الهرج قول ومنفعه

أعمل بما ينفعك في دنيا ودين
زووّد حصادك قبل يوم تودعه

احفظ صلاتك واعتني بالوالدين
واخوانك لحافك جفون ومدمعه

وازرع لك المعروف دام العمر زين
والجار لا تجفاه فأخبارك معه

واللي لفاك لحاجته لا تستهين
ما تحصد الا اللي بكفك تزرعه

كف الكرامة ما تقصره اليدين
يعطي ولو كانت يديه مقطَّعة

وانفق على المحتاج واعطف للحزين
خفف على صدر تضيق به أضلعه

فالمعطي الله وانت للمعطي تدين
اعطاك وامن لك دروب مشرعه

والعمر ساعة واحذر احذر يافطين
ترى الزمان اتدور دور الزوبعة

غير الذكي من يعمل لدنيا ودين
والصبر جنة في السنين الموجعة

فمرحبا مليون يا عام اربعين
يالله عسى في جيتك خير وسعة