قلت الهوا من شرق وايطق بالرّاس
واخيول فكري تصهل لشوف خلّي

المغترب قلبه رقيقٍ و حسّاس
و انا ابدوي فارقت بيتي و بلّي

عشرين عام ولا تهنّيت بإنعاس
قدام عيني سِـرْب عمري يـولّي

ملّيت أعِل القلب في قول لا باس
بكره تهون وشمسنا تب تهلّي

بكره تصير أيّامنا فرح واعـراس
وانحر بعير الهم من فوق تلّي

بكره وبكره ليل ما شاف نبراس
لا جيت مع نصفي ولا رحت كلّي

غيري أخذ معه الحزن جوله وداس
و انا الحزن ما فارقن ربع ملّي

ملعون يا وقت ٍ بك عطور دغلاس
اغلى من المسك الثّمين المحلّي

والله لو هالحظ به ذرّة احساس
كان الفرح دايم معي مثل ظلّي

والله لو يعطوني قصور و المـاس
ما اعاود الكرّه  بغـربه تعلّي

لو كنت في بحر الرديين غطاّس
او كان بي طبع الجفى و التخلّي

يمكن قنعت ف همّي و ذبلة الياس
و لا زعلت و غالي الدمع هلّي

يا الله وش هالدّار وش هذي الناس
مكاين ٍ بس للعمل ما  تملّي

و المشكله محد ٍ بنا يا عرب حاس
بُعْد الاهل ماهـو بلعب وتسلّي

تاجر واهزّ السوق واشعر بالافلاس
لا الارض هي ارضي ولا الفل فلّي

يا عين خبّي دمعـتك عن الانجاس
هذا النصيب وما حصل لي حصل لي

و يا قلب لا تحزن اذا طاح لك كاس
نجمك بعين اهلك كبير امتعلِّي

آموت اشرف لي على رمح جسّاس
ولا طخ راس وارفع اعلام ذلّي

بُكره تجي بَكره تشب شمع الاعراس
وافرح مع نصفي و بآعيش كلّي