اخواني الكرام اسعد الله اوقاتكم بكل خير ومحبه
يشرفني ويسعدني ان اقدم لكم هذه القصيده الهادفه
لعلها تنال اعجابكم وترقى الى مستوى ذوقكم الرفيع ...
بعض الدقايق خير من بعض ساعات
وبعض ساعات تمر مر الثواني
الله على بعض الليال القديمات
مرت على ذكراي مثل الاماني
عمار يا وقت الهنا والمسرات
وقتن مضا يا حي ذاك الزماني
وياحي بعض اصحابنا في زمن فات
ثابت على مبداه صدق وتفاني
اهل الوفا والطيب اهل المقامات
مثل الجدي وسهيل للمسرواني
والابعضهم للغثا والسماجات
اهل الحسد والقيل والقهقهاني
اهل النفوس النابيه والخبيثات
عن دربهم يفﻻن ربي نحاني
بين الردى والطيب ارض وسماوات
الطيب شامه في جبين الزماني
والناس اجناس من قديم الحضارات
احدن يروم الطيب و احدن اهداني
بعض الطيور يطير ويجيب جزﻻت
وبعض الطيور يحوس عند الصواني
وبعض الطيور يطير ويجيب حيات
وبعض الطيور يجيب كاس التهاني
طيرن سما بالجو رغم المعانات
وطيرن على شبرين ﻻزم يعاني
الحر حر وما عدا الحر هيهات
الحر يرقا شامخات المباني
والا الردي احبال عزمه رديات
خايب ضعيف الجاس مثل الغواني
يمشي يجيب علوم وينشر دعايات
يلعب على الحبلين ماكر اناني
مفتاح شر وشيطنه واشتباكات
ويعزف على اوتار كل الاغاني
لا شاف زولي يا صديقي سﻻمات
امرآت وجه وبالقفا مكلماني
بالمرجله ما طب سوق المهارات
ما للهقاوي في حياته معاني
المرجله والطيب ماهي شعارات
ولاكل سيفن تفتخربه يماني
وين الصديق اللي يشيل الثقيﻻت
يوم الليال السود هزت كياني
راحت اسود المرجله والمهمات
وياللاسف ما ضل غير الحصاني
هذا زمان الزعرنه والعصابات
وقتن به الانذال سادت زماني
صار الرخم والبوم هالوقت سادات
و طيور شلوى في وضيع المكاني
ونيت انا من خافق الروح ونات
ونت عطيب الجرح بين المحاني
السن يضحك والمواجع خفيات
والهم شيد في حياتي مباني
شب وشبابي للشقا والمعانات
الشيب ﻻح وقبل اوانه غزاني
طبع الليالي بالغثا مدلهمات
الله دخيلك من زمانن غشاني
دنيا دنيه كل ابوها متاهات
ما للمراكب في بحرها مواني
جملة مدارجها مداريج ويﻻت
هذا خبرها في صحيح البياني
غرت نماريد العرب والقيادات
عقب المعزه في ثياب المهاني
وين الحما واهل الحما والحمايات
وين القصور الشامخات المباني
وين الجحافل اصبحت والمعدات
وين التحدي راح وين الرهاني
وين المواكب والحرس والهتافات
وين الوﻻ وين الغﻻ والتفاني
وين الخدم وين الحشم والتحيات
وين المسك والعود والزعفراني
وين القنص والصيد وين الهوايات
وين الهجن والخيل والخيزراني
وين الظﻻل الوارفه والملذات
وين البنات الناعمات الغواني
وين الامل والمال وين الحسابات
وين الذهب والماس والكسرواني
وين المصانع كثرها والصناعات
ماكنها كانت وﻻ حي كاني
راحت باهلها ثم صارت حكايات
هذي ترى الدنيا قديمن وآني
دوﻻبها دوار بين المحطات
سبحان منهو في علقها بلاني
الله جعلها مدرسه واختبارات
يا ربنا هوون علي امتحاني
حسبي على كل الامور الصعيبات
حسبي آله الكون وحده كفاني
مالي سوى موﻻي في كل الاوقات
عالم خفايا الروح وايضا يراني
كل الامر لله ..... لله بالذات
واﻻ البشر هيهات مخلوق فاني
قول البشر لو قال يبقى روايات
يبقى مكان الشك مهما حداني
ادري كلام الناس ماله ضمانات
امشي ورى الاوهام وارجع مكاني
رزق الفتا مكتوب فوق السماوات
واللي انكتب ياتيك يا مودماني
اللي انكتب ياتيك دون احتمالات
مالك ترى يالعبد من رب ثاني
واختامها بعداد ما كاينن مات
واعداد ما عد الزمان بثواني
واعداد ما خط القلم بالسجﻻت
واعداد نبت الشيح والديدحاني
على نبي الحق وبل التحيات
بلغ جميع الناس سبع المثاني
بقلمي
ابو يزيد النعيمي
Copyright©2016 All Rights Reserved
