جـيـش الـدفــاع

شعر

ناجى عبد المنعم

 ----------

طل النهار

من طرف شيش الكون حزين

فاتكحل النن المسافر فى الوهن

          بالمغربية والأنين

وانا وسط فرض المعطيات

المستكينة للثوابت -

         والعلوج

           واقف حزين

أدخل محيط القلب -

وابدر فى المشاعر والهوى

         موج بعد موج

واشهر فى وش الريح شراع -

          القلب وابدأ فى -

              الولوج

لا يهمنى زحف السذاجة

على الجبين

ولا ولولات كل الفصول الاربعة

لحظة دخولها ف نن عين

قلب الأنين

         فوج بعد فوج

 

مجنون أنا

يمكن أكون

عاشق لترتيل الوطن

وانا باعزف اللحن المميز -

للتداخل فى

انتماءات الخروج

يمكن يكون

القلب لحظة عشق لكتاب المحن

دق الطبول للمعركة

فاستسلمت كل السيوف

لبشارة النور والأريج

يمكن أكون

أو  لا أكون

بس الأكيد

ان الشعاع

اللى ابتدى

يرسم خريطة للوطن

من غير تراب

من غير بنايات أو حفر

     من غير حدود

راسم على خطوط الجبين

العضمتين والجمجمة

      من غير سدود

فاضت على وش السما

نجمة داوود

فاتلفلفت فى لحظة البدء -

       الخرافه للنشيد

تراتيل مرمات الجيوش

          جوّه الضياع

واتكفن الجيش المفكك فى التابوت

وف  لحظة أصبح جيشنا من

              جيش الدفاع

 --------------------

من ديوان - أسفار الخندريس -

للشاعر ناجى عبد المنعم

 --------------------