عمري يراشد ماوصل صج ستين

لكن ثلاثيني خذتني لحوله

عمري قضيته هم وفراق غالين ..
ولاكان لي موطن !! لأن كنت دوله

دولة الم وأشواق لأهل وعزيزين
وأصحاب روحي من لهم دوم توله

عشريني منّي ضاع وجيت الثلاثين
.. اتعكز بصبر اليتم و الطفوله

الحزن في قلبي دماء الشرايين
واﻻ الفرح مآ شفت حتى رسوله

خاويت لي ناس على العهد وافين
محبّة ٍ ماجات فيها عموله

ليا لفوا مكانهم قرّة العين
شيمة رجل يعرف حقوق الرجوله

وكزيت من دفتر حساباتي ألفين
ربع الرخا جهّال قول ٍتقوله

اللي لياتضحك يصيروا ثمانين
وصاح جرحك طنّشوا مايجوله

غلـّـفتهم و أعلنت ... للبيع بالدين
ربع المصالح و الغدر في أصوله!!

و شاهدت باوروبا أجانب مسلمين
يخذلهم اللي يشهد الله و رسوله

وﻻ شفت خير من التسامح مع اللين
طبع ٍ كسب حربه على كل جوله

وﻻ شفت اوجع من طعون القريبين
وﻻ شفت أحلا من سنين الطفوله

و شاهدت ناس تحكي بالله و الدين
و هي مع الشيطان تسرج خيوله

و شاهدت من طيبه وصل للبعيدين
وعلى القرابه ما ازهلت به رجوله

حب التعنصر كنه سم الثعابين
ايسجل التدمير حزة وصوله

و شاهدت من يوفي بدرب المحبين
و عطيته في عمري دور البطوله

هذاك عمري معه فل و رياحين
يا زين تربيته و يا زين قوله ...

دعيت ربي و قول يا سامع امين
يصبح حﻻلي و اهتني به و اطوله

عايد مرزوق العويس _ ألمانيا