كُلْشِي كان بالصّدقِ وَاضَـحْ
وفلَحْظَة خَلِّيتِ سْمَايَاغْيُومْ
اتْغيّرْتِ،بعدما كُنْتِ اتْصَارَحْ
مابْقَى كْلامَك عَنْدي مَفْهُـوم
*****
ياالصّايَنْ عَهـْد سْنِينْ البَارَحْ
حَيّرْتيني وزدْتِ قلبي هْمُـومْ
صرتِ مَابينْ التايَهْ والرّايَحْ
ذخلتِ فدوّامة العشق واللُّومْ
ألفتِ حْكايَة،أنْتَ فيهاالمَظلوم
واصْبَحْتِ فبَحرْالحَيْرَة اتْـعُـوم
*****
ياالصّايَنْ عَهـْد سْنِينْ البَارَحْ
إلاَ اسْهالْ عليكْ،وظنّيتِ تَرْبَحْ
وتَبْني عَشّكْ على حْسَابْ الغِيرْ
ديرْ فبالك جَزاء كُلْ ظُالم مَكْتُوبْ
وأمَّا إلاَ احْكـَمْ عليك مُولْ التّدبيـرْ
الرّيحْ العاصْفة ليها فيكْ نَصيبْ
ساعَتها لاتبكي،
ونَزَّلْ سلاحَكْ ولا تقول:
هذاكان سعدي مقدَّرْ ومَكتُوبْ
*****
يا صايَنْ عَهدْ عَشْرة البَارَح
كلْ مَن اعْلاَ في الدُّنيَا شَانُه
لا زَمْ فيومْ مَنْ اعْلاهْ يَنْـزَلْ
وكل مَنْ اتْكبّرْ،واطْغى بجَهْـدُه
فثانية تْحينْ سَاعتُه ويَهــْزَلْ
ياالصّايَنْ عَهد سْنِينْ البَارَحْ
شحال مَنْ طاغيِ باتْ مااصْبحْ
*****
بقلم : الشاعرة
عائشة رشدي أويس
إسبانيا