|
|
|
|
|
|||||||
| هيئة إدارة تحرير مجلة عاشقة الصحراء التي تعنى بقضايا المرأة العربية والأدب والفن | |||||||
|
شگدْ رجيتك .................... كلمات الشاعرة والاديبة وفاء عبدالرازق - العراق
تخلق وْياي الصُبح
گتلك الجدران ضاگتْ
ضاگت وگتلي انتظرْ
وگلت بلچن نبتكر باحتمال
السِمه بوسة
ونوگع بخدّْ التمُر
وگلت بلچي نبتكر
روحين لسَّه امگمّطاتْ
بضَي فَجر
واوگفِت گدَّام شمعة
امبلَّله كلّي بضواك
ونضَّفتلك سمه زرگة مْنْ المطر
خاف تتبلّل اهدومك
وتفلَت اخيوط العذِرْ
صرت مطبگ غبشة
عنَّاي السماركْ
يدوّر بروحه نهاره
ويبحر بريگ العَصرْ
ايتيمة شِفتي
اوحيدة شِفتي
ومن ذكرتك
تزوّجت ريحة شجرها
وخلَّفتْ كل الخضر
صرت بيت الندى
وبين سر الورد گتلك
على اچتاف الندى اتَّچه
واعزم غصَين اليمر
صرت طبع الطبگ
وامتدَّيت خبزة
هِلِتْ هَيل الدنية بيَّه
وفصَّلتْ روحي اعلى گدَّك
هَيل منداف بصبر
واليفصّل جسمه گدَّك
لزِم عشر گلوب عنده
وكل صغير بعوده
يتوسَّع صدر
ومبتهج يفديك نعمة
يغمّس باسمك صلاته
ويلهج بإسمك ذِكِر
يزهر غروب الجدايل
ثگل شايل
مشط مهدود وتسودن
وسَوَدن بحيل الخصر
تزوَّگِت والله بسمارك
صرخت اوردو ابّدلتي
وداخل الكنتور سنيل
واگع بذلَّين شيلة
كلبچة الچنگال لمعة
والبريسم بالأسر
چا ولك كل هذا صرته
و مَ اطلبت فديوم منَّك
غير طبع الماي تبگى
وتدري عَ المايين
رابي امنّ الصّغر
چاولك كل هذا گلته
بحاجتك واردود أگلَّك
خذني حالوبة لدلالَك
اندهش بيك ابَّياضك
ومن اموعن
نسيمة عذبة بمزهرية
واقفل اعليها العُمر
وامتليت اوجود جيتك
بالعلا والجود امشي
ياللي سيل الدبِس طبعك
خذته جودات الفقيري
ويسَّرت كل العسر
گلت بشري ولچ روحي
إن عثرتي بروجه نهضي
صومي لو قصَّر الماعون موسم
أشّري الغفران بيدچ
والمكارم توسع بجيتچ شُكر
وهَم عنيتك وهَم رجيتك
نخلق بحفنة جفنَّه
الله ياحفنة جفن
شيمة وعين
واكتار وستر
استرني گتلك
شچت ظنون بصفحتي
واندهت:
يادهر ماليش غيره
يا ابو النهرين ياعنق الفضايل
ذنبي انتَ وتوبتي
وكفري وسجدتي
يا ورِد يابن الربيع
يمعروف السمه
ونطفة المزنات
حلمي عندك
وهَم صباي او لهوي
وسكتة الشيب بگذلتي
وصَومي وآنه اتحزمك ليلة قَدِر.
الكاتب:
سكرتيرة التحرير مريم حمدان بتاريخ: الجمعة 22-12-2023 09:28 مساء الزوار: 359
التعليقات: 0
|
